عبد الوهاب قضى ليلة رأس السنة.. تحت “الدكة “.. الفن بهدلة
موسيقار الاجيال محمد عبدالوهاب له ذكريات كتير مع حفلات ليلة راس السنة.. ومع ذلك عمره ما نسي ليلة راس السنة اللى قضاها تحت الدكة.
بيقول عبدالوهاب أنه وهو صغير سمع ان واحد من الكبار فى حى باب الشعرية عامل حفلة كبيرة واللى هيغنى فيه مطرب عبدالوهاب المفضل “الشيخ سيد الصفتي”.
مع بداية الليلة راح عبدالوهاب الى مكان الحفلة علي اعتبار انهم هيسمحوا له يدخل ويحضر عادي.. لكن صاحب الحفلة لما شافة لابس جلابية والناس كلها قاعدة لابسه اللى ع الحبل واخر شياكة وألاجة.. قال لواحد من الللى شغالين “طلع الواد ده برة”.
وعنها شد الراجل عبدالوهاب من الجلابية وطلعه برة.. لكن عبدالوهاب رفض أنه يستسلم وبدأ يفكر ازاي يحضر الحفلة ويسمع الصفتي.
وسط ما هو بيفكر لقى راجل عجوز شايل على راسه صينيه وعليها حاجات وداخل بيها السرادق اللى فيه الحفلة .. عبدالوهاب قاله “عنك يا حاج انا هشيلها مكانك”.. فالراجل اعتبرها مساعدة لطيفة ظريفة وقاله “كتر خيرك يبنى .. خد.. شيل وتعالى ورايا”
مشي عبدالوهاب ورا الراجل وعنيه رايحه يمين شمال بتدور على اتنين مالهمش تالت.. صاحب الليلة اللى لو شافه هيطرده.. والراجل اللى رماه بره السرادق واللى لو شافه هيطرده تانى.. ولما حس ان الدنيا امان نزل الصينية على ترابيزة من الترابيزات.. ولمح دكة عالية نزل جرى استخبى تحتها لحد ما خلصت الحفلة وهى بيتمايل على صوت الصفتي.
