كواليس فيلم حسن ونعيمة.. عبدالوهاب رفض الابطال ورشح حليم وفاتن حمامة .. واستدعوا البوليس لانقاذ محرم فؤاد

 

 

 

فى يوم من الايام كان الشاعر والكاتب عبدالرحمن الخميسي معزوم فى بيت سعاد حسني.. وهو هناك شاف سعاد ولمح قد ايه هي موهوبة وقالها فى اليوم ده “انتى هتبقى نجمة فى يوم من الايام”.

وقرر الخميسي أن يخلى سعاد الخجولة تخوض تجربة التمثيل واداها دور اوفيليا حبيبة هاملت فى المسرحية اللى بيعملها.

 

 

و قرر الخمسيى أنه يحول المسلسل الاذاعى اللى عمله عن حسن ونعيمة الى فيلم.. واتفق مع بركات على إنه يتولى الإخراج واتفق مع موسيقار الأجيال أنه يتولى الإنتاج.

 

 

فى الجلسة الأولى للترشيحات.. اتفق الخميسي وبركات أنهم هيقدموا الفيلم بوجوه جديدة واختاروا سعاد حسنى فى أول تجربة سينمائية لها والمطرب محرم حسين فى أول تجربة سينمائية له.. لكن لما راحوا يقعدوا مع عبدالوهاب قالهم لا.. أنا مش موافق.. لد “الاتنين دول صعب نبيع الفيلم بيهم.. مين هيوزع فيلم بطولة اتنين جداد”.. وهنا بركات قاله ان المسلسل نجح فى الاذاعة والقصة علقت مع الناس يعنى أكيد الفيلم هينجح ..د

 

 

ومن هنا موقف عبدالوهاب المتعنت بدأ يتلخلخ.. فقال “طيب خلاص نعمل الفيلم بمحرم ومعاه نجمة كبيرة زى فاتن حمامة مثلا.. أو نعمله بسعاد ومعاها عبدالحليم حافظ وأحمد رمزي”.. لكن بركات والخميسي أصروا على أنهم يكملوا المغامرة للأخر ويقدموا التجربة بالوجوه الجديدة.

 

 

اتصل الخميسي بسعاد وبلغها الخبر وكانت طايرة من الفرحة واتصلوا بمحرم وبلغوه الخبر وقالوا تعالى أمضى العقد فى مكتب الاستاذ..

 

 

بيقول ابن محرم انه فى اليوم ده محرم عرف ان الفيلم هيبقى فيه خمس اغانى .. 4 منهم يغنيهم محرم وواحدة تغنيها سعاد .. بس عبدالوهاب بعد ما سمع صوت الاتنين قال بلاش سعاد تغنى فى الفيلم دلوقتى لان صوتها لسه محتاج تدريب.. وهنا لقى محرم بيقول “وانا شايف ان بلاش 4 اغانى.. 2 كفاية وميكونوش من تلحين الاستاذ عبدالوهاب”..

 

 

طبعا عبدالوهاب سمع الكلمتين دول فساب الجلسة ومشي.. وجري وراه بركات والخميسي.. ورجعوا لمحرم قالوا له “فيه حد يطول ان الاستاذ يلحن له وانت تقوله لا “.. فقال لهم ـ بحسب شهادة ابن محرم “لو عبد الوهاب لحن لي في اول فيلم ليا يبقى مين هيلحن لى بعده؟”.

 

 

فى الوقت ده اتعقدت الازمة وطلب عبدالوهاب أنهم يدوروا على بديل محرم واتطرح اسم ماهر العطار اللى رفض أنه يمثل بجلابية وقالهم “انا مطرب الجامعات ازاى أمثل فى السينما بجلابية؟” .. وبعد الفيلم قال انه ندم على انه اعتذر عن الفيلم.

 

 

المهم.. انه بعد رفض العطار رجعوا تانى لمحرم .. والمشكلة اتحلت لما عبدالوهاب تفهم وجهة نظره.. وفى اليوم ده تم الاتفاق على اسناد مهمة تلحين الاغنيتين اللى فى الفيلم لمحمد الموجي.. وتم تغيير الاسم الفني لمحرم .. لان عبدالوهاب كان شايف ان اسم محرم حسين اسم ظابط او دكتور فقاله اختار لك اسم تانى .. فاختار “محرم فؤاد”..د

 

 

بدأ تصوير الفيلم.. وتم تصوير الداخلي فى استوديو ناصبيان.. بينما الخارجي كان فى الفيوم.. وقبل ما يسافروا طلبت سعاد انها تسافر قبلهم علشان تقعد مع الفلاحات وتعرف بيمشوا ازاى ويتكلموا ازاى ويتعاملو ازاى .. وده نفس اللى هتطلبة تانى لما تيجي تعمل الزوجة الثانية.

 

 

فى الوقت ده بدأت سعاد تاخد دروس مكثفة.. أولا على القراية على يد إبراهيم سعفان.. وثانيا فى الاداء على ايد محمد توفيق اللى ظهر معاها فى الفيلم بدور “ابن صبيحة”..

 

 

وهما فى الفيوم .. كانت اكتر المشاكل اللى يقابلوها ان الناس بتتلم حواليهم وقت التصوير.. وفى الفترة دى العمدة كلف مجموعة من الغفر إنهم يكونوا موجودين مع فريق العمل فى اى مكان علشان يبعدوا عنهم أى حد يضايقهم.

 

 

وفى يوم من الايام كان بركات عايز يصور مشهد وليمة كبيرة معمولة فى القرية .. وكانوا وقتها فى رمضان.. وفكر انه يستعين بناس من القرية لكنهم رفضوا وقالوا يستحيل ناكل .. فقال لهم “هتعملوا انكم بتاكلوا لكن مش هتاكلوا”.. فوافقوا لكن وقت التصوير واحد كل بجد .. وبدأ اللى حواليه يهاجموه وضربوه وهو راح جاب اهله وبقت عاركة وباظ المشهد اللى اتكلف شيء وشوايات.

 

 

بعد ما انتهى التصوير فى القرية بركات ادى فريق العمل كله اجازة وقال هنكمل بعد اسبوع على ما الديكورات تخلص.. وفى الوقت ده محرم سافر اسكندرية.. وقعد هناك 9 أيام.. ومبقاش حد عارف هو فين.. لدرجة أن بركات لما فشل أنه يلاقيه فى البنسيون اللى كان قاعد فيه عمل اعلان فى الجرايد يطلب منه الرجوع للاستديو..د

 

 

بيقول محرم فى لقاء تلفزيونى أنه فى اليوم التاسع دور على اى وسيلة مواصلات ترجعه القاهرة مفيش.. لحد ما لقى سائق عربية بتنقل جرايد اداله 50 قرش وقاله خدنى معاك.. وفى العربية لمح الاعلان اللى بيطلب رجوعه فى الجورنال فأول ما نزل من العربية طيران على الاستديو بشنطة هدومه.. وقال انه من يومها بقى ما يفوتش أى معاد.

 

 

وقت عرض الفيلم قرروا انهم يعملوا له دعاية بطريقة مبتكرة فكتبوا فى الاعلان ” لكل حسن، وكل نعيمة، أنتم مدعوون لمشاهدة فيلم حسن ونعيمة بالمجان الاثنين القادم فى سينما ميامي، وفيميتا بالقاهرة، وفريال بالإسكندرية، وسينما مصر بطنطا، وعدن بالمنصورة، كل ما عليك فقط أن تحضر معك بطاقتك الشخصية”..

 

 

ولما اتعرض الفيلم نجح بشكل كبير.. لدرجة ان الجماهير يوم العرض الأول شالت محرم وفضلت تمشى بيه فى الشارع وطلبوا الشرطة علشان تخلصه منهم بعد ما بدلته اتقطعت.. وقال محرم ان الجمهور من بعد الفيلم ده كان بينده له ويقوله يا حسن.. وقال كمان أنه فى شركة قماش استغلت نجاح الفيلم وعملت نوع قماش جديد اسمه “رمش عينه”.