حفلة فاتن حمامة للانتقام من منتج الافلام  

فى فنانين كتير كانوا بيعانوا زمان ولحد دلوقتي من موضوع القسط الاخير اللى المنتج بينعم عليهم بيه مع نهاية العمل.. ومن الفنانين دول فاتن حمامة اللى مرة اتعاقدت مع منتج على فيلمين دفعة واحدة.. وفضل المنتج يراوغها ويتهرب منها فى القسط الاخير.. وهنا قررت فاتن انها تاخد القسط بطريقتها الخاصة..

عرفت فاتن حمامه ان فيه اكتر من فنان مش عارفين ياخدوا اقساطهم من المنتج اياه فاتصلت بيهم وقالت لهم “انا عازماكم على حفلة صغيرة عندي”.. وفى نفس الوقت اتصلت بالمنتج اياه وقالت له “انا خلاص هبطل انتاج لنفسى وعايز استشيرك فى بعض الامور فياريت لو تشرفنى فى البيت”..

مخدش المنتج اياه اى خوانة وفى الموعد المحدد كان موجود فى شقة فاتن اللى لقى فيها كل الفنانين اللى كان بيتهرب منهم.. ويومها طبعا اتعملت عليه الحفلة ومنزلش من البيت الا وهو ماضي كمبيالات بالفلوس اللى عليه للفنانين كلهم