احمد الحداد فنان واجهته مشكلة جسمه النحيف

واحدة من اكبر المشاكل اللى كانت بتواجه احمد الحداد فى شبابه هى ان جسمه كان قليل وده كان دايما يدي للبعض انطباع أنه قدام “شاب صغير”..

وحكى الحداد موقف حصل معاه فى مرة وقال انه كان رايح لواحد صاحبه.. وبعد ما دخل واستقبله نده لأمه علشان تيجى تسلم عليه .. وقالها “احمد الحداد عندنا “.. فالست دخلت تسلم واول ما فتحت الاوضة قالت له “هو فين يا ابنى ؟” فقالها “ما هو قاعد قدامك أهه” .. فبصت له باستغراب وقالت له “ينيلك .. ده انا كنت فاكراك رجل كبير .. تطلع عيل”..

الحداد ضحك وحاول يعدي الموقف وقالها : “ياست لا مش عيل ولا حاجة.. أنا راجل والله” .. فالست رجعت تانى تبص له باندهاش وتقول : “يخيبك.. ده أنا كل ما اسمعك فى الراديو يصادف واكون بسبك التقلية فأسيبها ع الوابور واجرى على الراديو اسمعك وفى الاخر تشيط مني”..

ضحك الحداد تانى وحاول يعدي الموقف تاني.. وقالها “معلش يا ست حقك عليا”.. فقالت له : “ولا حق ولا حاجة.. اقعد اقعد.. بس لازم تحكي لى حاجة بالصعيدي”.. وفضل احمد يحكي ويحكي لحد ما بدأ يشم ريحة شياط..فقالها “أنا شامم ريحة حاجة شايطة”.. فالست شهقت شهقة كانت هتوقع سقف الشقة وقامت تجري وهى بتصرخ وتقول : “يا نهار اسود دى الحلة كلها شاططت مش التقلية بس”..

وقال الحداد انه فى اللحظة دى خاف من رد فعلها فنزل يجري على السلم.. بينما يتبعه صوت صاحبه وهو بيقول : “ما تخافش يا احمد ارجع.. أمي طيبة والله ومش هتعمل لك حاجة”..