سفاح النساء.. حسين زايد فنان طارده النحس

الفنان ده من فيلم “سفاح النساء” .. اللى عمل فيه دور مهم ومركب لسفا*ح عنده عقدة من مراة ابوة خلته يخطف الستات ويحنطهم.. ويعمل لهم تماثيل شمع فى عالم الخلود زى ما كان بيقول.

الفنان ده اسمه حسين زايد.. مواليد 1924 وبدأ اول دور له فى فيلم المليونيرة الصغيرة انتاج 1948 مع فاتن حمامة.. وده كان اول فيلم يمثل فيه رشدي أباظة.. ويوم العرض الاول ليه وبحضور ابطال الفيلم الجمهور مشى من دار العرض وكانت أول اشارة على فشل الفيلم لدرجة أن رشدي فكر أنه يعتزل قبل ما يبدأ اصلا..

حسين بعد الفيلم ده قعد 11 سنة بعيد عن الوسط كله .. ومحدش كان عارف هو فين.. لحد ما رجع بدور صغير برضه فى مسرحية “المفتش العام”.. وبعدها اختفى 7 سنين.. لحد ما رجعه فؤاد المهندس للسينما بدور صغير فى فيلم العتبة جزاز .. اللى ظهر فيه بشخصية الراجل ابو ايد مقطوعة ومركب مكانها ماسورة بلاستيك اتنين بوصة فى اخرها خطاف بيستخدمه كـشوكة فى الاكل عادي.

بعد الفيلم الكل توقع انه يختفى زى ما عود الناس لكن حسين زايد شارك فى السنة اللى بعدها بـ 3 أفلام مرة واحدة.. فيلم عبودة عبده عبود مع أمين الهنيدى وده كان دور عادي .. أما فؤاد المهندس فقرر أنه يفاجئ الكل واداله دورين مرة واحدة.. الأول دور صغير وشبه عادى فى فيلم عريس بنت الوزير.. والتانى دور عمره فى فيلم سفاح النساء.. وعمل هو دور السفاح اللى بيتحول عيل صغير أول ما يسمع اغنية ماما زمانها جاية.

بعد دور السفاح حسين زايد لفت انظار الكل ليه.. وبقى الطبيعى أنه يتعرض عليه ادوار أكبر وأهم.. وفعلا المنتجين بدأوا يدوروا عليه عشان يمضوه لكن حسين فاجئ الكل واختفى.. فالناس قالت شوية ويظهر زى كل مرة.. لكن المفاجأة أنه مظهرش وفضل مختفى من 1970.. لحد 17 يوليو 1991.. لما اتنشر يومها خبر وفاته.