داكر عبداللاه يكتب..اسفين يا خطيب
كتب داكر عبداللاه عضو مجلس الشعب السابق رساله دعم إلي الكابتن محمود الخطيب رئيس النادي الأهلي بعد البيان الذي صدر اليوم من مجلس الأهلي بعد أزمة لقاء فاركو بالدوري الممتاز.
وكتب داكر عبداللاه أسفين يا خطيب
▪️أسفين لأنك إتشتمت لأول مره فى مصر لمجرد انك فكرت ترشح نفسك لرئاسة الاهلى
▪️أسفين لأنهم فتحوا عليك بلاعات السب لأنك اصبحت رئيس للاهلى
▪️أسفين لأنك رفضت الكفيل فى الوقت اللى غيرك كان بيبوس ايده
▪️أسفين لأنك بتتشتم بسبب الاهلى و حقك ضايع لانك بتحافظ على الاهلى و مش بتسمع الكلام
▪️أسفين لأنك ضربت القاضيه و رجعت دورى الابطال بعد غياب ٧ سنين
▪️أسفين لان مفيش قانون يحميك
▪️أسفين لأنك حققت ٢٠٪ من تاريخ الاهلى الافريقى فى سنتين اللى بدأ من سنة ١٩٧٦
▪️أسفين لأنك أول لاعب فى الاهلى يحرز هدف فى بطولة افريقيا سنة ١٩٧٦
▪️أسفين لأنك جيبت أول بطوله افريقيه بأقدامك و اهدافك فى النهائى سنة ١٩٨٢
▪️أسفين لأن من بعد أخر بطوله افريقيه خدناها وقت اعتزالك سنة ١٩٨٧ قعدنا ١٤ بدون بطولة افريقيا
▪️أسفين لأن من يوم ما كنت عضو مجلس ادارة و دخلت لجنة الكوره من اكتر من ٣٠ سنه اخترت و إتعاقدت و خلصت صفقات صنعت مجد الاهلى و لو كنت ناسى أبوتريكه يقولك
▪️أسفين لأنك جيبت ضعف حقوق الرعايه و البث
▪️أسفين لأنك رفعت ميزانية الاهلى لاضعاف
▪️أسفين لأنك فتحت فروع و عملت انشاءات
▪️أسفين لأنك خليت الاهلى أفضل مؤسسه عربيه رياضيه و يدرس فى الجامعات الاسبانيه
▪️أسفين لانك جيت فى الزمن الغلط حرموك من جمهور الاهلى اللى فى الاستاد و صنعولك جمهور جديد إتربى فى السوشيال ميديا و فى مدرسة رضا عبدالعال
▪️أسفين لانهم بيحطوا راسك براس أو بيقارنوك بواحد لا مؤاخذة فى نادى تانى
▪️أسفين لأنك عشت وشوفت ولاد الاهلى بياكلوا فيه علشان وظيفه فى اتحاد كوره او منتخب او فى قناه
▪️أسفين لأنك عشت و شوفت الجمهور اللى كان حما ناديه اصبح الاداه اللى بيستخدموها لهدمه و هما بيضحكوا عليه
▪️اسفين لانك جيت فى زمن الإحتواء و روح البرتوكول و الخطابات المستخبيه و المتاهه الوزاريه و إعلام الاسكريبت الموحد
▪️أسفين لأنك اخر الرجال المحترمين
▪️أسفين لأن اللى هايجى بعدك هاينفذ كل اللى نفسهم فيه و هايهد كل اللى إنت و اللى قبلك بنوه
