يسري حسان يكتب: الأستاذ إسماعيل مختار تعالى لي بقى!

أمهلت الأستاذ إسماعيل مختار فرصة حتى العاشرة صباح اليوم ، ليصحح الكلام الفارغ الذي قاله فى فيديوهاته.. وبناء على طلبات بعض الأصدقاء مديت المهلة شوية..كده المهلة خلصت ياسماعين.

نشر الأستاذ سماعين ثلاثة فيديوهات.. اضرب 3 في 10 يطلعوا 45 يبقى ليه عندي 45 فيديو ينطح فيديو.. وح أرجع للسبعينيات وأفصل قميص أبيض وأحطه جوا المنطلون زي ماعمل الاستاذ سماعين وهو طالع في الفيديو.

الاستاذ سماعين يتاجر بالمهرجان القومي للمسرح

الاستاذ سماعين يتاجر بالمهرجان القومي للمسرح ويقول للشباب ادعموا المهرجان.. طب هو أنا جيبت سيرة المهرجان ياراجل.. بطل مزايدة والنبي.. مشكلتي مع البيت الفني مش مع المهرجان الذي ادعمه بقوة.

الأستاذ سماعين يقول إنني كنت في لجنة اختيار عروض البيت الفني للمشاركة فى المهرجان القومي للمسرح العام الماضي مع الصديق الغالي محمد هاشم ووافقت على دخول عرض هاشم المهرجان القومي ولم اعترض على وجوده فى اللجنة.. كداب فى أصل وشك ياسماعين من غير استاذ ولاحاجة لأن محمد هاشم لم يكن له عرض فى مهرجان العام الماضي.. ان كنتو نسيتو اللى جرا هاتوا الجداول تتقرا!

سماعين يقول إنني أتبع أسلوب الإخوان.. مش ح اعمل زيك ياسماعين ولا ح انشر” الاسكرينات شوت” إللى وصلتنى لان ده اسلوب رخيص وبقى قديم قوى .. عيب عليك احترم منصبك.. أخبار مخازن الديكور إيه؟؟؟؟

سماعين يقول إنني اتبع أيضا أسلوب الابتزاز.. ياسماعين احترم نفسك ومنصبك .. المبتز ده يبقى ليه عشرين تلاتين نص مثلا فى كل جهات الانتاج.. “خلطة شبرا” ده أول نص لى ياراجل وقدمته بناء على طلب مدير مسرح الطليعة واسأله. واسأل كمان وزيرة الثقافة المحترمة د.إيناس عبدالدايم أنا ابتزيتها امتى وفين وهل حصل مرة واحدة إنى طلبت منها حاجة واحدة تخصني؟

بلاش د. إيناس ..عندك الفنان العالمي الكبير فاروق حسنى ،والمحترمون الأعزاء الكبار:الدكتور صابر عرب والدكتور عماد أبو غازى والدكتور عبدالواحد النبوى ،وزراء الثقافة السابقون  المحترمون،أسألهم وأتحداك لو كنت طلبت أي شئ يخصنى من أي وزير فيهم وهم أحياء يرزقون ربنا يديهم الصحة.

كبيرك رئيس القطاع

بلاش الوزراء لأنك صعب تكلمهم ..أنت كبيرك رئيس القطاع.. اسأل مدير الطليعة نفسه لما كتبت له أشعارعرض” موت فوضوى صدفة” وتنازلت عن أجري لأنهم فى مسرح الشباب سألونى عايز كام؟.. وانا تصورت ساعتها إن السؤال غلط ومايصحش فأقسمت إنى مش واخد ولا مليم..واتكتب ع الافيش “الأشعار مهداة من يسري حسان” مع إن السؤال كان المقصود منه آخر أجر حصلت عليه كان كام عشان يعملوا زيه.. هشام عطوة كان مدير الشباب ساعتها اسأله كمان لما بعت له مقايسة نشرة مهرجان النوادى الأخير وماحددتش المبلغ اللى يخصنى تأدبا منى، ولما هو عمل مبلغ معين بناء على المبالغ اللى حددتها لمدير التحرير وسكرترالتحريرورغم إنه ماكانش مبلغ كبير ولاحاجة طلبت منه تخفيضه ،وساعتها قال لى ربنا يكرمك ماحدش بيعمل كده.. وقال بس انا حددته بناء على الأجور اللى انت حاططها لزملائك الآخرين عشان يبقى فى نسبة وتناسب ولو بسيطة.

واسأل الشاعر الكبير سعد عبدالرحمن اللى قدمت له مذكرة رسمية لما كان رئيس هيئة قصور الثقافة بتخفيض أجرى25 فى المية كرئيس تحرير لمسرحنا وتم ماأردت.. واسأل الفنان الكبير أحمد عبدالعزيز لما كان رئيس المهرجان القومي وكنت مسئولا عن الإصدارات أنا دفعت كام من جيبي على توضيب الكتب وأخدت كام من المهرجان..ياراجل حرام عليك في مبتز يعمل كده؟

استنى التقيل جدا أوعى تقفل الصفحة ياسماعين.. أفصل قميص أبيض زي قميصك  وأحطوا فى المنطلون ..وارجع لك دوغري!