الفنانة امال رمزى .. مارى منيب قدمتها لفرقة الريحاني

آمال رمزي اتولدت فى إسكندرية لأسرة متوسطة.. حياتها كانت البيت والمذاكرة وبس.. لحد ما راحت في مرة السينما وانبهرت بيها.. وبقت تخصص يوم فى الأسبوع تروح فيه السينما وترجع منها تقف قدام المراية تقلد البطلة.. اللى بتكون فى الغالب فاتن حمامة لأنها كانت مغرمة بيها جدا..

وبما إنها بتحب التمثيل كانت آمال أول واحدة تجري على فريق التمثيل اللي تم تكوينه في المدرسة .. وبقت تمثل وتمثل لحد ما فى يوم واحدة زميلتها قالت لها “أنا أعرف حافظ عبدالوهاب مدير إذاعة إسكندرية.. إيه رأيك تروحي له تعرضي عليه موهبتك وهو يساعدك؟”..

سمعت آمال النصيحة وراحت لحافظ اللي أول ما شافها قالها “امشي يا بنت روحي كملي دراستك الأول”.. فخرجت آمال من مكتب حافظ وهى بتجرجر أذيال الخيبة لكنها فضلت كاتمة الحلم جواها في انتظار الوقت المناسب..

وفى سنة 1961 جه الوقت المناسب .. لما اتخرجت واتجوزت من المنتج كمال صلاح الدين اللي قدمها في فيلمه يوم الحساب.. ومن بعده توقعت آمال إنها تنطلق في الوسط وتكمل.. لكن للأسف بعد سنة حصل الطلاق.. فرجعت تاني تدور على فرصة .. لحد ما جات سنة 1964 وشاركت بدور صغير في مسلسل “الست نجف”.. يومها بطلة المسلسل اكتشفت فيها موهبة .. وقالت “هى دي اللى ناقصة فرقة الريحاني”.. وفعلا قدمتها للفرقة اللي ضمتها فورا وقدمت آمال معاها 16 عرض كانوا بمثابة الانطلاقة الحقيقية ليها..

عارفين البطلة اللى قدمتها لفرقة الريحاني دي تبقى مين ؟ تبقى ماري منيب.